Kolegji gjen probleme në hetimin e KPK për ish-prokurorin Ferdinand Elezi

Në një vendim të mbushur me kritika për punën e Komisionit të Pavarur të Kualifikimit, Kolegji i Posaçëm i Apelimit arsyetoi me shumicë në favor të lënies në fuqi të vendimit për shkarkimin e ish-Prokurorit të Apelit të Durrësit, Ferdinand Elezi.
Në vendim, Kolegji arsyetoi në favor të Elezit për disa prej ankimeve të tij të fokusuara në analizën financiare, të cilat e përmirësuan bilancin negativ nga 3 milionë të llogaritura nga Komisioni i Pavarur i Kualifikimit në 1 milion lekë.
Por trupa gjeti se hetimi i KPK-së për disa prej pasurive nuk kishte qenë i plotë. Sipas KPA-së, trupa e Komisionit e drejtuar nga Firdes Shuli, me relator Lulzim Hamitaj dhe Olsi Komici anëtar, kishte pranuar arsyetimet e Elezit për financat të pambështetura në dokumentacion. Kolegji shprehet se në apelim, këto probleme që do rëndonin situatën e subjektit nuk ishin marrë në konsideratë, për shkak të rolit prej “garantisti” që KPA merrte në këtë rast.